మార్పు (తప్పని సరి ముగింపు)

continued from మార్పు (తప్పని సరి)

చిన్నప్పటి ఫోటో ఆల్బమ్స్ చూపించింది. కొన్ని ఫోటోలు చూసి

"మీకు డాన్స్ వచ్చా ?” అన్నాడు.

"చిన్నప్పుడు నేర్చుకున్నాను.”

బీరువాల్లో పుస్తకాలు, ఏవో ప్రైజులు, కప్పులు సర్ది ఉన్నాయి.

ఆ ప్రైజులు చూస్తూ, "ఇవన్నీ మీవేనా?" అడిగాడు

"కొన్ని నావే కానీ, ఎక్కువగా మల్లివి.”

"మల్లి అంటే.." అడిగాడు.

"మల్లీ" అని పిలిచింది. ఎవరో ఒక అమ్మాయి వచ్చింది. తొమ్మిదో క్లాసు చదువుతుందేమో, వచ్చి నమస్కారం చేసింది. ఆ అమ్మాయిని చూపించి,

"పేరు మల్లీశ్వరి. మల్లి అంటాం.” ఆ అమ్మాయి, తన గురించి చెప్పటం విని సిగ్గు పడి పారిపోయింది.

చుట్టాలమ్మాయేమో అనుకోబోతుంటే, తర్వాత చెప్పింది.

"వాళ్ళ నాన్నమా పొలం లో పనిచేసే వాడు . పాము కాటుతో చనిపోయాడు. వాళ్ళ అమ్మ ఇంట్లో పని చేస్తుంది. మా ఇంట్లోనే ఉంటారు. నేను డాన్స్ చేస్తుంటే, చెస్ ఆడుతుంటే చూసి నేర్చుకుంది. ఒక్క సారి చూస్తే చాలు తొందరగా పట్టేస్తుంది..”

"ఈ అమ్మాయిని ఎక్కడో చూశాను. గుర్తుకు రావడం లేదు.” మల్లి గురించి చెప్పాడు.

వీణ, వయొలిన్ లాంటివి ఏవో సంగీత వాయిద్యాలు చూసి,

"పాటలు కూడా పాడతారా?”అడిగాడు.

"మీకిష్టమేనా మ్యూజిక్?”

"వినడం చాలా ఇష్టం”

ముందు భోంచెయ్యండి అని తీసుకెళ్ళింది.

భోజనం చేసే టైం లోమల్లిని అడిగాడు.

"నిన్నెక్కడో చూశాను, ఎక్కడో గుర్తుకు రావడం లేదు.”

"అది లోకల్ చెస్ ఛాంపియన్, అప్పుడప్పుడు ఫోటోలు పేపర్లలో పడుతుంటాయి.” చెప్పింది

"నిజమా? గ్రేట్.” ఆ అమ్మాయిని మెచ్చుకున్నాడు.

భోజనాలు అయినాయి. ఆమె లైబ్రరీ రూమ్ లో కూర్చున్నారు. ఆమె అతను పాట వింటాడని దానికేవో సిద్ధం చేసుకుంటూ ఉంది.

ఇంతలో అక్కా అంటూ వచ్చింది మల్లి. వెంటే ఆ అమ్మాయి తల్లి కూడా.

పుస్తకాలున్న బీరువా వైపు నడిచి ఏదో తీసి చూస్తూ ఉంటే వెనక నుండి మాటలు వినిపిస్తున్నాయి

" అక్కా, స్కూల్లో ఫంక్షన్ " అంటూ ఏదో చెప్పడానికి ఆ అమ్మాయి సందేహిస్తూ ఉంటే తల్లి ముందుకొచ్చి,

"స్నేహితురాళ్ళంతా పరికిణీ ఓణీలు వేసుకుందామనుకున్నారటమ్మా, దీనికేమో నేను కుట్టించలేదు. ఇప్పుడు హఠాత్తుగా గొంతు మీద కూర్చుంది.”

"మేనేజర్ ని అడిగి డబ్బు తీసుకెళ్ళు, బజారు తీసుకెళ్ళి కొనిపించు.”

"సాయంత్రం లోపల కుట్టించడం వీలుపడదమ్మా, ...” కొద్దిసేపు ఆగి చిన్న గొంతుతో "మీ పరికిణీ ఓణీ ఏమైనా...”

తల్లీ కూతుళ్ళు ఈమె నిర్ణయం కోసం ఎదురు చుస్తూ నిల్చున్నారు.

"సల్వార్ కమీజ్ వేసుకెళ్ళు, డ్రెస్ కోసం ఏమిటా పేచీలు?”

తల్లీ కూతుళ్ళు వెళ్ళబోతుంటే, తల్లిని వెనక్కి పిలిచి

"దానికి నచ్చజెప్పు రంగమ్మా, అడిగినవన్నీ వెంటనే చేతికందితే కష్టాలంటే ఏం తెలిసొస్తుంది. జీవితం అంటే ఒక తేలిక భావం వొస్తుంది.” అంటోంది ఆమె.

వాళ్ళు నెమ్మదిగా అక్కడినుండి వెళ్ళిపోయారు.

ఆ అమ్మాయిలో ఆశాభంగం స్పష్టం గా కనిపిస్తూ ఉంది.

అతనేమీ అడగకపోయినా చెప్పింది.

"వీళ్ళకెంత చేసినా చాలదండీ. ”

కాస్సేపు మౌనంగా కూర్చున్నారు.

అతను లేచాడు, "వెళ్ళొస్తాను" అంటూ.

"ఏమైనా మర్చిపోయారేమో?” గుర్తు చేసింది. పాట పాడమని అడుగుతాడని..

"ఏమీ లేదే?”

ఒక్క క్షణం ఆగాడు.

" మీ లక్ష్యం గురించి మీరు మళ్ళీ ఒకసారి ఆలోచించుకోండి. ఆల్ ది బెస్ట్.” చెప్పాడు.

ఆమె మాట్లాడకుండా అతన్నే చూస్తూ ఉంది.

అతను వెళ్ళిపోయాడు.

అలానే కూర్చుంది సాయంత్రం వరకు. అంతవరకు పరిచయం ఉన్న మగాళ్ళెవరూ ఇలా ప్రవర్తించలేదు. అందరూ తన స్నేహం కోసం ఎంతో ప్రయత్నించేవాళ్ళు. ఏమిటితను?

ఎప్పుడూ జరగనంత అవమానం జరిగినట్టు కూర్చుంది.

రాత్రి అయింది.

తండ్రి వచ్చాడు.

"ఏమ్మా, నీ ఫ్రెండ్ వచ్చాడా? ముందే వద్దామని ట్రై చేశాను , కుదర్లేదు. ఏమైనా అనుకున్నాడా నేను రాలేదని.”

"ఊహూ..” అంది.

కూతురిలో నిశ్శబ్దాన్ని గమనించి "ఏమ్మా, ఏమయింది?”

తండ్రి రూమ్ లో కూర్చుని జరిగింది చెప్పింది.

" నేను చేసిన తప్పేంటి నాన్నా, , డబ్బులిస్తున్నాను కదా?”

"నేను చెప్తే, నువ్వు బాధ పడతావు" హెచ్చరించాడు తండ్రి.

"లేదు నాన్న, చెప్పు "

"కొత్త బట్టలు కొనడానికి నీకు అభ్యంతరం లేదు, కానీ మల్లి, నీ బట్టలలో, నీలాగే కనపడటం , ఒప్పుకోలేక పోయావు. డబ్బు సహాయం ఒక్కటే సరిపోదు, నీ స్థాయి జీవితాన్ని మల్లి కూడా గడపాలని కోరుకోగలగాలి.”

"చాలా మంది కన్నా, నేను నయం కదా?”

" వాళ్ళు ఎక్కువ, నువ్వు కొంచం తక్కువ. అందరూ ఒకటే. పనివాళ్ళు సమానమవుతారంటే మాత్రం ఒప్పుకోలేరు. ఇచ్చే పొజిషన్ లోనువ్వు, తీసుకునే పొజిషన్ లో మల్లి ఉండాలి అనుకుంటే, అతను చెప్పినట్లు ఇగో సంతృప్తి కోసం మల్లిని వాడుకోవడమే.”

“.......”

"మల్లిని నీతో సమానంగానే కాదు, అంతకన్నా కూడా పైకి ఎదగనివ్వాలి, అదీ సంతోషం గా,

నువ్వు, ప్రజలకేదో చేద్దామనుకుంటే మాత్రం, నీలో ఈ మార్పు తప్పని సరి. అలాంటి మార్పు నీవల్ల కాకపోతే వదిలెయ్, నువ్వు నీలానే ఉండు కానీ, రాజకీయాలు, ప్రజల్నేదో ఉద్ధరించేసే కార్యక్రమాలు పెట్టుకోవద్దు.”

***********

ఆ తర్వాత అతనికి ఎప్పుడూ ఆమె జిమ్ దగ్గర కనిపించ లేదు. హఠాత్తుగా లేచి రావడం, ఆమె లక్ష్యం గురించి ఆలోచించుకోమనడం పొగరుగా అనిపించి సిగ్గుపడ్డాడు. ఆమెకిష్టమైనట్లు ఆమె ఉంటుంది, తనెవరు ఆమె మీద ఆదర్శాలు రుద్దడానికి అనుకున్నాడు.

కొన్ని నెలల తర్వాత, జిమ్ కల్చరల్ యాక్టివిటీస్ లో భాగంగా జరిగిన డాన్స్ పోటీలకు అతన్ని గెస్ట్ గా పిలిచారు. గెలిచిన వాళ్ళకు ప్రైజులివ్వమని. డాన్స్ చేసిన వాళ్ళలో మల్లిని గుర్తు పట్టి పలకరించాడు.

"చాలా బాగా చేశావు." అభినందించాడు మల్లిని.

మాటల్లో చెప్పింది. "అక్క ఇక్కడే ఉంది సార్. ఇద్దరం కలిసే వచ్చాం."

ఇంతలో ఆమె కూడా వచ్చింది.

ఒకరినొకరు పలకరించుకున్నారు.

ప్రోగ్రామ్ అయిన తర్వాత,

మల్లి క్లాస్ మేట్స్ కొంత మంది ఇంటికెలా వెళ్ళాలి అని చూస్తూ ఉంటే,

"మల్లీ, డ్రైవర్ తో వెళ్ళి వాళ్ళను దింపేసిరా, నేనిక్కడే ఉంటాను నువ్వొచ్చే వరకు" అని చెప్పింది ఆమె.

"ఇంత రాత్రి ఇక్కడేం కూర్చుంటారు. మా హాస్పిటల్ పక్కనే కదా, రండి" అని పిలిచాడు ఆమెను.

మల్లి , స్నేహితురాళ్ళతో కలిసి డ్రైవర్ ని తీసుకుని వెళ్ళింది.

హాస్పిటల్ ముందు ఆగారు. స్టాఫ్ నిద్ర పోతున్నారు. అలికిడి లేదు.

"లోపలికెళ్దామా?" అడిగాడు.

ఇక్కడే బాగుంది అంటూ పూల తీగెల కింద పేషంట్ల కోసం వేసిన బెంచ్ మీద కూర్చుంది.

కొంత సేపు మాటలు లేవు.

"ఆ రోజు మీ లక్ష్యం గురించి నేనలా మాట్లాడకుండా ఉండాలనిపించింది, సారీ." అన్నాడు.

కొంచం సేపు మౌనంగా ఉండి చెప్పింది.

“మీరెళ్ళిన తర్వాత నేను నాన్న తో మాట్లాడాను.” అని తండ్రి తనతో చెప్పిన విషయాలు చెప్పింది.

"ముందు మీమీద బాగా కోపమొచ్చింది. తగ్గడానికి చాలా టైం పట్టింది. అవసరానికి డబ్బు సహాయం చేయడమే గొప్ప అనుకున్నాను కానీ, వాళ్ళని నాతో సమానంగా చూడలేక పోతున్నానని గమనించలేదు. నాన్న కోరుకున్నట్లు నేను ఆలోచించేవరకు రాజకీయాల గురించి ఆలోచించకూడదనుకున్నాను.”

"విమర్శను ఒప్పుకోవడం, మిమ్మల్ని మీరు విమర్శించుకోవడం తేలిక కాదు. మీలో అది మంచి విషయం.” చెప్పాడు.

కొద్ది సేపు మౌనం గా కూర్చున్నారు.

"ఇంకేమిటి విశేషాలు?” ఏదో మాట్లాడాలి కనక అడిగాడు.

"మల్లి, అండర్ 20 వరల్డ్ చెస్ టోర్నమెంట్ కు క్వాలిఫై అయింది. వచ్చేనెల బ్రెజిల్ వెళ్తున్నాం. తనతో ప్రాక్టీస్ చేయిస్తున్నాను.”

"నిజమా? సంతోషం.” అభినందిస్తున్నట్లు చేయి అందుకుని చెప్పాడు

మాటల్లో ఒక పది నిముషాలు గడిచిన తర్వాత, ఆమె కారు వచ్చి హాస్పిటల్ ముందు ఆగింది.

వెళ్తానని లేచింది.

ఆమె చెయ్యి ఇంకా అతని చేతిలోనే ఉంది. 

***